【旅遊】飛行系上網訂票個人經驗談
▲出行紀錄，放文頭鎮一鎮個post。其實有一半以上都係登機閘詐欺，我唔係419。
咁頭先見到有個好長嘅post，簡單講就有人用facebook login去「去到盡」旅遊網，然後俾佢地用咗facebook名去訂機票最後上唔到機又追討唔到賠償。
〈Facebook 嵌入〉
咁我呢啲飛行系避世男子（？）都成日上網book機票、酒店、火車票、夜行巴，雖然對網上購票唔太喜歡，但又窮又要飛的確係要咁啦～由十幾歲開始用兩三千玩到六、七日都要多謝旅遊網站。
大大話都用咗呢種網站幾十次，講返少少個人經驗：
1. 千萬唔好用facebook、google login。
除咗有機會發生好似原post比人用social media嘅資料全部填入個AC嘅問題外，個Fb/google AC都可能會冇咗。雖然唔會拎唔返，但拎返都麻煩囉。真係想貪方便登入應該用email注冊再Link落外部account，當個account冇咗仲可以disconnect。
當你第一次用嗰個網站，你人手輸入返正確資料，咁就包保冇死。
◆之前用過Facebook login，全部資料寫晒「青木翔也」，訂票又自動幫我填「青木翔也」、信用卡卡主又自動幫我填「青木翔也」，最後咪慢慢改囉。
▲係咁懶嫁啦。不過訂之前都係要對一次囉。
2.填完表對名，收到確認信都對名。
主要都係國際航班問題，錯名上唔到機。但有數次經驗係試過錯咗性別，最後都上到。◆我同5個朋友訂紫色老母航空去日本，一個人負責訂。咁就樣衰嘅，有一個男嘅喺張機票填咗「Ms.」，坐機場巴士時仲好驚會唔會上唔到機，廉航喎，機票都改唔到喎。最後？來回都冇人care。
至於國內航班，大多都係可以用QR code上機，只要你安裝航空公司apps，去到機場可以直接過安檢。呢個情況錯咗名其實都可以上到機。不過當然盡量避免啦。
酒店嘅話，到達目的地先發現錯名嘅情況，網上訂房基本上都需要信用卡，如果係小錯，核對過信用卡都係可以俾你入住。未到目的地就更簡單，改就得，或者喺免費取消期內取消再訂。
◆有段時間我啲酒店全部用「Mika Cheng」訂，當然一聽就知唔係全名。去到，又對確認信又對信用卡（信用卡用Passport名），最後都俾我住。當然廢事煩訂咩而加都改晒用Passport名。
巴士、火車大部分都睇確認信、QRcode入閘，甚至叫你講名出嚟就得，所以問題不大。（日本夜行巴士都係對名）
▲冇得用QRcode入嘅機場，喺安檢前去自助劃位機度嘟張boarding pass出嚟就得。
3.唔好去不知名網站訂
有啲旅遊網雖然機票好平，但有聽過去到機場先發現冇人名，或者當有問題時個CS十問九唔應。其實「支Trip」、「去到盡」咁大間都已經十問九唔應啦，細間其實更加唔應你。
另外不推薦「支trip」延遲出票，「支Trip」延遲出票係出發前72小時先幫你出票。有人曾經有出唔到票嘅經驗，咁成個行程又冇咗了。
4.留意廉價住宿要求
21歲以上呀、冇持有該國護照呀、40歲以下呀、女性限定呀，啲字會好細粒，通常要拉到最低先睇到，要多加注意。特別係先付款嗰啲，冇得退款。◆當時睇到一間話「18歲以上可入住」，我即刻book咗。但過一日，唔小心發現其他都係寫「18歲或以上方可入住」，問清楚「18歲以上可入住」嗰間先知原來係19歲先住得。當時可以免費取消，我就即刻取消咗。
▲好彩我係過咗18歲嘅兒童。
5.機票改名退票
傳統航空公司冇800-1000走唔甩，廉航=再買過，訂票前多加留意，佢有問題真係要即刻投訴。◆經旅行社訂票，改機票錢會平少少，試過幾次都係20%-30%左右，網上訂票就貴啦，見過好多50%手續費，仲要自已同航空公司/訂票網溝通。
留言
張貼留言